昨日在電視新聞上看到這位老師的發言，覺得這位老師很勇。

謝謝你，吳老師，我知道你的言論不是單單為自己發表的，你是為了你的學生們發表的。

能夠把自己的事業都押下來發表的言論，你比太多人勇敢多了。

前幾日去睇2012時，收到媽咪個留言，通知我話已經應承左18號我妹以前個男roommate會搬來屋企住。

香港屋企只得我同妹住，佢以前帶個男朋友返黎屋企住，男朋友俾我趕走，佢自己跟埋人走，後來又話我趕佢走。半年前佢搬返來住，又俾我發現佢帶男朋友返屋企過夜，每次俾我 發現，佢都同媽咪講話以後唔會帶人返來訓。

我收到message準備返屋企同媽咪講話有男人搬來住唔方便既時候，又俾我撞到我妹帶男人返屋企過夜。睇唔到樣，因為我只見到佢閂房門時有個人訓左晌張床到。我拍門問佢入面係邊個，同佢講話媽咪話唔可以帶人返屋企。點知佢唔開門不特止，仲話叫媽咪親口同佢講丫。我之後話再唔開門我就報警，佢竟然話你咪報囉。

然後我好嬲，行左去廚房諗住睇下可以點做，就見到廚房一地都係啤酒樽蓋同啤酒樽。

打去加拿大搵媽咪又冇人聽。

唔知道房入面係咩人，唯有想辦法開房門，但又擔心唔安全，所以我右手拿住屋企最長個把刀，左手拿住屋企入面最長既螺絲批，準備開門。

我仲猶豫開唔開門既時候，電話響，因為把聲好唔妥，我將件事講左出來。後來朋友叫我唔好衝動，先打俾媽咪，唔好撞入去，2個人對一個人，始於對我不利，如果再搵唔到就報警。

結果打左幾次終於搵到媽咪，媽咪話佢會同個妹講，然後再打返俾我。

過左幾個字，媽咪打來話我妹個朋友已經走左。佢話我妹同佢講，返到屋企淨係對住4面牆，同我又冇咩好講，好寂寞，所以帶朋友返來睇碟。然後佢又應承以後唔會帶人返來。

不過我最後都係將把刀同螺絲批留左係房入面個廁所到。

第二日，我敲我妹房門話有野同佢傾，敲左好耐佢都唔應門，我問佢係咪搵左，佢又冇反應，所以我擅自開左佢房門入去睇下咩事。結果佢睇碟唔理我，我同佢講野佢原全冇反應，好似聽唔到咁。

尋晚我聽到佢房有怪聲，拍門又冇人理，我拿住支大螺絲批開門衝左入去，睇下咩事，原來佢又睇碟。

之後我叫佢執返自己d啤酒罐同洗返自己d碗，結果佢當然冇做。

今日佢個msn竟然寫住：做咩要恐嚇我

哈! 我估唔到原來熱愛睇stephen king小說的會覺得咁係恐嚇。

今日佢叫左開鎖佬返黎換鎖，可能個開鎖佬太後生，我以為係佢d朋友。

之後點知佢房把鎖要換就要成把鎖換，唔可以淨係換鎖芯，所以可能要改天再換啦。

但係我當住個開鎖佬面叫佢記得執返d啤酒罐，如果唔係我就掉晒入佢房。

咦，頭先佢又真係洗晒d碗喎。。。。

不過我仲晌個開鎖佬面前，同媽咪講電話理論，話如果佢換鎖，就成日偷偷地帶男朋友返來鎖埋房門，佢最鐘意帶唔同男朋友返屋企訓，男朋友又夠厚面皮俾人趕走完都仲走上來，又容易寂寞，自己話冇男朋友訓唔著覺，所以先要跟埋個男朋友走。

依家諗返起，我又好似唔應該係人地面前咁講佢，但係既然係要講人壞話，何必背著人講，就係佢面前講。

然後佢就句句都加返一兩個粗口黎同我講野。

仲要話自己係碩士生，荒死人地唔知佢學歷高，我同佢講：你真係前途無限喇。

屈係心入面好唔舒服，臭屎真係唔應該冚，要抖抖氣。

今日竊聽風雲第一日上映，我地就一齊去左睇喇~!

我覺得好好睇呀，而且故事仲好寫實添。

是一套用心拍而且好man的電影。

之前睇另一套由劉青雲主演的再生號，我覺得以中文戲來說，算唔錯，但總覺得欠缺左d咩，唔係好值得買飛去戲院睇咁。

而電影開始之前的預告片播的是另一套由古天樂主演的大內密探零零狗，典型王晶式的港產喜劇，有d擔心會唔會又係唔值得去戲院睇中文戲呢？不過睇完竊聽風雲完全令我對中文戲改觀lu，原來香港都有好電影的!

聽日就去北京lu，我會好好好好好好好好好好好好掛住ray的。

我很喜歡Michael Jackson這首歌You are not alone。

今日遲左出發，Ray本來話睇cctvb新聞話唔係好多人，所以都有d擔心成4點先開始行會唔會趕唔切。

由天后踏入維園先發現原來擔心係多餘的，因為仲有好多人未出發。

不過我地剛剛踏入球場行到差不多中間，就俾d警察指左去另一邊行出街喇，所以唔知道數人頭有冇計到我地。

行到街上前面塞住行唔到唯有乾曬。

後來聽到好多人起哄，右面突然多左條電車線行，我地都跟住行。

電車上面的乘客大多都支持我們，我仲見到有些電車乘客要求遊行人士俾d遊行標語旗幟俾佢地，為遊行人士打氣添!

可惜在電車路上trap左好耐，一直大家都有大喊"開路"，但天橋上面的白色制服警察就懶懶閒咁淨係望住我地。

好彩有d大廈遮太陽，在30幾度的炎熱天氣企成個鐘，真係會中暑的。

(p.s.當時我地身邊有老人家，小朋友，仲有傷殘人士，但係警方一直都唔肯開路，當時路面上面已經冇車行，30幾度企咁耐真係會中暑的，唔通警察要等到有人中暑先肯開路俾我地行？)

中途有一個藍色制服警察在遊行隊伍中，由後面走上前頭，一面喊"其實我支持你地架，不過你地等我行去前面了解下咩事先!"。

眼見d藍色制服警察同我地一樣大家身水身汗，但係d白色制服的警察就在天橋和電車上懶得理我地，真係豈有此理，絕對要減白色制服的警察人工!

後來直到有人喊"向前行"，大家開始一步步咁向前行，擾攘左成個鐘終於可以正式出發，原來民主大道真的不容易走。

中間等開路時停左一陣，所以在路邊買左水飲，然後繼續行。

差不多行左3份1我就跟住Ray在行人路上扒頭，之後我地行得好快，不過一路行都見到好多人，好多唔同既隊伍，但係成日都行下停下咁，行人路雖然都有d塞，不過尚算暢順。

大概7點左右去到政府總部。

真係好累呀～～～～　不過我覺得很有意義。

行電車線 (16:40)

等待期間

開路！開路！開路！

應該減人工的白色制服警察

身水身汗的藍色制服警察

差唔多去到ｓｏｇｏ喇 (17:35)！

見到鵝頸橋(17:55)

長毛的背脊

可愛的草泥馬

差不多到政府總部(18:48)

Donald Tsang is a Poor Guy

中環碼頭等船返尖沙咀時見到西九龍的ICC原來都差唔多起好。